Ua tapena le Matagaluega o Aoga ma Aganuu e auai atu i faaaliga o tu ma aganuu a atunuu o le Pasefika lea o le a faia i Hawaii i le masina o Iuni o le tausaga nei.
Mo le silafia o lea faamoemoe e tai 4 tausaga ma faatautaia o se avanoa e faaali ai tu ma aganuu a le atunuu lava ia.
O le tausaga e 2020 na fuafua e faia ai lea faaaliga tele, peitai e lei faataunuuina ina ua aafia atunuu uma o le lalolagi i le faamai o le Koviti-19, ma sa tolopo mai ai i le tausaga lenei.
Na faailoa e le Minisita o Aoga ma Aganuu, ua tapena le matagaluega aemaise o le ausiva a faiaoga e auai atu i lea faamoemoe tele.
E lua vaiaso o lea faamoemoe ma o le a auai atu ai le Minisita ma le Ofisa Sili o le Matagaluega.
Ta’ua e Seuula e lei mautu se numera o le aumalaga, pau le tulaga o loo tagatagai iai pe ā ma se toa 60 o loo vaavaai iai e malaga.
E oo foi i le itu tau seleni ua talosagaina le Matagaluega o Tupe mo se fesoasoani.
Faailoa mai e Seuula e fua le fesoasoani a le malo i le aofai o le aumalaga o le a malaga atu.
O le faaaliga o tu ma aganuu a atunuu o le Pasefika o le a faatautaia mai i le aso 10 seia oo i le aso 21 o le masina o Iuni o le tausaga nei.
