O loo faatino nei galuega ua toe faafou ma faaleleia ai le Malumalu tapua’i o le Ekalesia Faapotopotoga Kerisiano Samoa i le nuu o Moataa i le itumalo o le Vaimauga, i le faamoemoe o le faafeagaiga, le susuga Semikueva Faatoafe Ugapo ma le ekalesia, e mae’a uma ia galuega a o lei samiina i le masina o Tesema o le tausaga nei, le iupeli auro poo le 50 tausaga talu ona fausia le Malumalu.
O le faafeiloa’ina o le meleniuma fou i le tausaga e 2000 na faafou ai le malumalu, peitai ua faaalia e le faafeagaiga i le upega tafa’ilagi a le kalapu lakapi a le afioaga, o le 24 tausaga talu ona mae’a faafeiloa’i lenei meleniuma ua satia nisi o vaega o le maota tapuai, o le mafuaaga lea o galuega o loo faatino i le taimi nei, e pei ona tauofo ai nisi o aiga ma matāfale.
O le faamoemoe ia faamanatu le limasefulu tausaga o le malumalu i le aso 15 o Tesema ua mae’a uma ia galuega.
Ua ave ai nei le faatalauula a le faafeagaiga ma le aulotu EFKS a Moataa i tamafanau uma a le ekalesia i Samoa ma soo se tafa o le lalolagi, ina ia auai faatasi ma le aulotu e patipatia le iupeli auro o le malumalu i le masina faai’u o lenei tausaga, o se taimi tāua ua mae’a galuega o le tausaga, ae ua tumutumu foi le atunuu i aiga ma uo mai atunuu mamao o le a malaga mai i Samoa i aso mālōlō o le Kerisimasi ma le Tausaga Fou.
