Ua faailoa ai nei e le pulega o le atina’e o tagata tafafao maimoa mai i Samoa le tapena ai o se ‘aumalaga o sui o pisinisi tau faletalimalo i le atunuu faapea ni sui mai le auaunaga tuma’oti o loo faatinoina le galuega o le faatafafao o tulisi e malaga mai i Samoa poo tour operators e malaga e faalauiloa lo tatou atunuu i se faaaliga o lea atina’e e faia i Ausetalia i le masina nei o Novema.
O lea faalauiloa poo se roadshow e amata i le aso 11 o Novema le Aso Lua a sau ae mae’a i le Aso Lulu 13 o le masina nei lava.
Ua faamoemoe e afea ai aai tetele o Brisbane, Melepone ma Sini ma ua fuafua e auai le 150 o pisinisi i Ausetalia o loo latou faalauiloa le atina’e o tagata tafafao ma o ia foi auaunaga tau pisinisi e faia faalauiloa o Samoa i totonu o Ausetalia o se tasi o atunuu o loo pito to’atele tulisi e malaga tafafao mai i Samoa.
Faaalia e le pule o maketi ma faalauiloa o Samoa i atunuu i fafo i se tusitusiga faalauaitele mai le pulega o tagata tafafao a Samoa, o Losa Ma’ia’i Wallwork o le malaga atu i Ausetalia mo lea faalauiloa o se avanoa tāua lea o Samoa e faailoa ai auaunaga uma o loo maua i le atunuu e faatosina mai ai tagata tafafao.
O faamaumauga o tagata tafafao na afea Samoa i le va o Ianuari ma Iulai o le tausaga nei e 98,192 ma o le 25 pasene o tulisi e mai Ausetalia; o Niu Sila e 47 pasene.
E tolu kamupani vaalele o loo malaga mai ai tulisi mai lea atunuu o le Virgin Australia, Qantas ma le Fiji Airways.
O le kamupani vaalele a Niu Sila o le isi lea auala o fela’ua’iga o loo malaga mai ai i Samoa tagata tafafao.
