O lipoti faaleaganuu poo cultural reports lea e avea o se vaega o le faia o le faaiuga i se faasalaga o se tagata, o le a lē toe totogiina lea mai tupe a le au totogi lafoga ina ua pasia i le taeao analeila i le Palemene le pili ua faaigoa i le faaperetania, Legal Services Amendment Bill.
Ua pasia ai lona faitauga faatolu i le Palemene.
O lipoti e pei ona agai iai lenei mataupu, e faaigoa foi o le vaega 27 poo le section 27 ma ua faailoa e le minisita o faamasinoga, Paul Goldsmith o lona uiga la o le a faamuta ma le alu o tupe a le au totogi lafoga i se faiga e lē matuā iloga ona penefiti ai le tagata na faia agai iai pe na afaina o se solitulafono.
Ua ta’ua i lipoti a le One News ina ua amata tuufaatasia le tulafono lea i le silia ma le 20 tausaga talu ai, sa fuafua e faataga ai le faamatala gutu o se lipoti i le talaaga o lē ua solitulafono e se tasi e na te silafia lelei lē ua solitulafono ma e masani ona faia e sana uo mamae poo se tasi o lona aiga.
Afai la ae amata faagaioi loa le pili fou lea o lona uiga o le a lē toe aofia ai lipoti ia i le legal aid funding.
Ua faailoa i nisi lipoti manatu faaalia o nisi, afai nei ae aveese le fesoasoani lea o lona uiga o le a totogi lava e le tagata lona lipoti lona uiga e na o i latou o le a mafai ona gafatia ona totogi.
E ui i lea e manatu le malo o lea seleni tele o le a faasaoina mai ii o le a fesoasoani i nisi poloketi atiae.
