O faafitauli sa molimauina e leoleo i solo a taavale i le mae’a o le taaloga a le Toa Samoa ma Tonga, ua taunuu ai le Sui Komesina ma le pulega o le matāgaluega o leoleo, falepuipui ma le toe fuata’ina i le taofi loa o le toe tuuina atu o se pemita faataga ia i latou o loo tapenaina le solo a taavale e faailoa ai le lagolago malosi i le ‘aulakapi liki a le atunuu i lana taaloga i le faai’uga o le vaiaso nei.
E lē o talia gofie lea faai’uga e le to’atele o loo sauni i le faia o solo a taavale.
Le Sui Komesina o le matāgaluega o leoleo, falepuipui ma le toe fuata’ina, susuga Leiataua Samuelu Afamasaga i sona finagalo e faamanino ai le māfua’aga o le faai’uga e lē toe faamatuuina atu se pemita faataga e faia ai se solo a taavale mo le tapua’iga a le atunuu i le taaloga a le Toa Samoa ma le Warriors a Niu Sila e sa’ili ai le siamupini o le taamilosaga o le ipu o le Pasefika i le lakapi liki.
