Taofi lē tumau e le faamasinoga teuteuga o le faavae na pasia i le lua vae tolu, se’i mae’a ona su’esu’e le lu’i faaletulafono

March 27, 2025
Samoa
Tusia: Galumalemana Autagavaia Tipi Autagavaia

635

Ua faatulaga e le Faamasinoga Maualuga le aso 30 o le masina fou o Aperila e iloilo ai le lu’i faaletulafono a le ta’ita’i ma le sui ta’ita’i o le Itu Agai ma le vaega faaupufai e puipuia aiātatau a tagata, lea o loo tuua’ia ai le Fofoga Fetalai i lona palota i le sa’ilia o le lua vae tolu na pasia ai teuteuga o le faavae o le tausaga 2025 e autū i le faasolomuli o ni vaega o le tulafono o Faamasinoga o Fanua ma Suafa o le tausaga e 2020.

O le faatulaga ai o le aso e iloilo ai lea mataupu tau faamasinoga faasino i le tulafono faavae, ua faia ai ma le poloa’iga lē tumau poo se interim order a le faamasinoga e taofia faagasologa o teuteuga o le faavae i lona faaaogāina se’i mae’a ona tagofia le lu’i faaletulafono ua finauina ai se poloa’iga a le faamasinoga e faalēaogā ai le lua vae tolu na pasia ai e le Palemene ia teuteuga o le faavae.

E pei ona silafia o le aso 26 o le masina na te’a nei o Fepuari i le tauaofiaga a le Palemene na faatino ai le palota tauvalaau na sa’ilia ai se finagalo o le fono aoao faitulafono pe talia pe teena ia teuteuga o le faavae lea na faailoa ai e le Fofoga Fetalai le susuga Papalii Lio Oloipola Taeu Masipa’u, ua na talia le fautuaga a le Loia Sili e mafai ona faia lana palota i le sa’iliga o le lua vaetolu e maua ai le numela 35 mai le aofa’iga e 53 o nofoa o le Palemene e pasia ai ia teuteuga.

O le faai’uga o lea palota tauvalaau e 36 sui faipule na palota e talia teuteuga e aofia ai le faipule e to’atasi o le Itu Agai.

Peitai o le palota a le Fofoga Fetalai o le autū lea o le finauga i le faamasinoga, o loo finau ai le itu talosaga sa lē tatau ona palota le Fofoga Fetalai e tusa o aiaiga o le Vaega 58 o le tulafono faavae.

Afai ae manumalo lea finauga, o le talosaga a le itu tagi ia faalēaogā le faai’uga na pasia ai teuteuga i le lua vae tolu ona o le 35 o palota pe a aveese le palota a le Fofoga Fetalai e lē o se numela e ausia ai se lua vae tolu o nofoa e 53.

O le Fofoga Fetalai ma le Loia Sili a le Malo o loo faasaga iai le mataupu a le ta’ita’i o le Itu Agai le susuga Tuilaepa L Sailele Malielegaoi, ma le sui ta’ita’i le tofa Lauofo Fonotoe Nuafesili Pierre Lauofo Meredith.