O le afioga ia Afamasaga Taimalietane Matatumua ua 26 tausaga o auauna ma tautua i le malo o Samoa i le Matagaluega o Faatoaga ma Faigafaiva; o ia le uluai tama’ita’i ua filifilia e see atu e tau’ave le tulaga o le Ofisa Sili o le Pulega o lea Matagaluega tele a le malo o Samoa, i le tuanai o tausaga sa tau’ave ai lea tulaga maualuga e le itupā o ali’i.
O le Aso Faraile ua mavae na faailoa ai e le ta’ita’i o le malo le afioga i le Palemia, susuga Laaulialemalietoa Leuatea Polataivao Fosi Schmidt lea filifiliga ua faamautū i se finagalo autasi o le Kapeneta.
O le afioga Afamasaga Taimalietane Matatumua o loo ia umia faailoga tikerikī ma faailoga tipiloma i tomai o galuega tau faatoaga lea sa faamanuiaina ai i a’oa’oga i le Iunivesite o le Pasefika i Saute.
Ua sui tulaga o ia i se tamali’i sa tauaveina le tulaga Ofisa Sili o lea Matagaluega le afioga Dr Seuseu Tauati o se tamali’i sa faauluulu iai i ni tausaga ua mavae se tasi o auaunaga tāua a le malo le nofoaga tutotonu o su’esu’ega faasaienisi.
