O le manaoga lena o se tasi o alii taalo iloga o le Manu Samoa, ina ia faaavanoa mai e le alii lakapi i le tulaga o le firs-five sa taalo ai mo le Wallabies a Ausetalia, Christian Lealiifano sona taimi e taaalo ai mo le ‘au a lona atunuu i ana taaloga faitaulia.

O Lealiifano ua 34 tausaga o lona soifua ma e 26 taaloga faitaulia na taalo ai mo le Wallabies, ae ua tolu nei tausaga talu ona muta le taalo a lea alo o Samoa talu mai ona faamuta e Egelani le faamoemoe o le ‘au a Ausetalia mo sona avanoa e manumalo ai i le Ipu a le lalolagi i le 2019.

E lei toe filifilia ai lava talu mai lena taimi, le alii o Lealiifano e le faiaogaulu a le Wallabies, Dave Rennie, lea na see atu i le tofi faiaoga o le ‘au i le tausaga 2020. O loo ave le faamuamua a le faiaoga i lea tulaga, e filifili i ai Quade Cooper, James O’Connor ma Noah Lolesio.

Ae o le tala fiafia, e ono mafai ona faaaogā Lealiifano e taalo mo le Manu Samoa, auā ua toe o se aga ona saoloto lea e taalo mo se isi ‘au, ina ua sui tulafono a le World Rugby mo aiaiga e agavaa ai tama lakapi e taaalo mo isi ‘au.

Na amata mai le aso 1 Ianuari, ua mafai ai e tama sa taaalo i ni taaloga faitaulia (test-capped players), ae ua atoa le tolu tausaga talu ona lē toe taaalo i ni taaloga faavaomalo, ona taalo mo se isi atunuu, pe afai o le atunuu lena sa soifua ane ai o latou mātua poo gandparents.

E ui o Lealiifano na fanau i Niu Sila, ae o ona mātua na soifua ane i Samoa, o le a agavaa ai la Lealiifano e taalo mo Samoa e amata i le aso 19 Oketopa, lea e atoa lelei i ai le tolu tausaga talu ona lē toe filifilia i le Wallabies.

Lona uiga e mafai ona taalo Lealiifano mo Samoa i le taaoga faitaulia a le ‘au ia Novema, faapea ma le tausaga fou i taaloga o le Ipu a le Lalolagi o le a faia i Falani.

E tāua tele le sao o lenei alii mo le ‘au a Samoa pe afai o le a taalo ai, ma o se tulaga lelei lea mo le faiaoga o le ‘au le susuga Seilala Mapusua, auā o Lealiifano ua tele lona tomai i le faatinoga o le taaloga, aemaise foi ona agavaa o se ta’ita’i ma le faatinoga o faaiugafai i le taimi o taaloga.

O mafuaaga lena o le naunau o lana uo, le midfielder a le Manu Samoa, le alii o Henry Taefu, ia sui mai e Lealiifano lona tulaga e agavaa ai e taalo mo le Manu Samoa, i lalo o tulafono fou lea ua iai a le World Rugby.