I le faagasologa o lipoti a komiti o loo talanoaina i le Fono a le Palemene i vaiaso nei e lua, na maua ai le finagalo o le Sui Faipule o le Itumalo o Anoama’a 1 ia Alai’asa Sepulona Moananu i le tatau ona faia o se komisi suesue o le nonoga tupe a le Faletalimalo o le Sheraton Beach Resort i Mulifanua.
O le faletalimalo lenei sa faia lana nonogatupe i le NPF ona oo lea i se tulaga ua tuua peimeni o le nonogatupe ma iu ai lava ina le toe totogia.
O atugaluga o le alii faipule ona o lea e ave le avanoa e le NPF i pisinisi tetele e ala i nonogatupe nei ae o loo faaletonu le totogiina, peitai e itiiti le avanoa o loo tuu atu i tagata faisaofaga e nonō ai mai le faaputugatupe lenei mo le manuia o le atunuu.
O le isi tulaga o loo faaalia e le alii faipule o le liliu ai lea o le nonogatupe e avea ma sea, peitai e leai se tupe a le NPF o loo maua mai ai.
O le 2020 na faatau mai ai e le NPF le silia i le 200 eka o le fanua o loo tu ai le Faletalimalo i Mulifanua. Na faaalia e Alai’asa e gau lava lenei faletalimalo.
Sa tulai le suitaitaifono o le Komiti ia Aliimalemanu Alofa Tuu’au ma faamalamalama sea o le faletalimalo lea sa amata i le 23 miliona ona faaitiitia lea i le 17 miliona i le 2020, o le tausaga ua maveae na pa’ū maualalo ai i le 8 miliona.
Sa ia faailoa o loo iai se faiga o loo faaaoga e le NPF e fua ai le aoga o sea o le kamupani e aofia ai ma le NPF, ma o tausaga uma lava e fua ai sea, ae o le tulaga i le pa’ū ai o sea mai tausaga ua mavae ona o lea sa feagai ma le Koviti-19 ma e lei iai ni malo na nonofo ai.
Sa faamanino e Aliimalemanu e le o pa’ū le tupe peitai o le tāua poo le aogā (value) o le sea o loo faaitiitia.
Na faailoa foi e taugata tele le fuaina o sea ma e tatau ona tailima tausaga ma faia e pei ona iai le sueina o aseta a le malo o loo iai nei, o le faia o lea tulaga e tuuitiitia ai le feosofa’i o le tāua o le sea a faletalimalo.
Ua faailoa e le Sui Minisita ia Leota Laki Lamositele o loo tilotilo totoa iai le NPF i ni auala e foia ai le faafitauli o lea faletalimalo.
O le kamupani lava lenei o loo iai foi le isi ona faletalimalo i le taulaga o Apia lea foi sa nonō mai le $50 miliona mai le Faletupe o Atinae a le atunuu ma o le tulaga foi lea e tasi na oo iai, ma o se tasi lea o faletalimalo mai le 11 o faletalimalo e lei toe mafai ona totogi atu a latou nonogatupe i le Faletupe o Atinae.
Ae sa tuuina atu e le malo le avanoa e faatautu’i ai nisi faletalimalo peitai sa taofia le faia o lea tulaga i le Sheraton seia iloa pe na faapefea ona faia le maliega i le va o lea faletalimalo ma le malo talu ai, a o lei faia iai se faaiuga a le malo o loo tulai nei.
