I le feiloaiga a le Palemia o Fiti ma le mamalu o tagatanuu Fiti i le po o le Aso Tofi o le varaos na tea nei, na faaalia ai se mataupu i le manaomia lea o se sui o le Malo o Fiti i Samoa nei e faafaigofie ai mataupu e ona moomia ai se fesoasoani.
Na ta’ua e le Peresitene a le Asosi o Tagatanuu Fiti i Samoa nei, susuga Lai Kaivei o lenei mataupu e tāua tele lea ma e ao ina faaleo atu i le Afioga i le Palemia i sana fesoasoani.
“Sa matou talosaga atu i le Afioga i le Palemia i se sui o le Malo o Fiti i Samoa nei poo se Amepasa poo se Konesula foi e feagai lea ma mataupu matou te moomia ai le fesoasoani.
“I le paeaiga lea na mae’a atu nei sa leai sa matou fesootaiga ma e 80 le pasene o tagata Fiti o loo iinei e lei mafai ona faatino palota i le faigapalota na mae’a atu nei ona o le tulaga lea o le leai o se sui o le Malo o Fiti i Samoa nei e faailo ai nei vaega.
“E le gata foi i lea o mataupu i tusifolau ma nisi o pepa matou te moomia ai faamaoniga mai Fiti sa matou toe malaga lava i Fiti e faatino ai tulaga uma e tali ai o matou faafitauli.
“O le tele o tausaga ua mavae e lei mafaia ona foia le tele o mataupu ma faafitauli a o matou tagata o loo iinei o le tulaga lena ua leiloa poo fea a sulu iai mo se fesoasoani, pau le vaega na matou faatino o le fesoasoani lea o le matou asosi e tali atu i nisi o vaega o loo manaomia ai le fesoasoani.”
Na ta’ua e Kaivei sa faaleo muamua lenei mataupu i le faigamalo na tulai mai muamua ae peitai e lei faataunuuina lava lenei manaoga, ae o lea la ua iai le po anapo e faaleo ai i lana Afioga i le Palemia.
“Sa faapea e ono manuia la matou talosaga ae peitai e leai, sa iai foi le manatu e afio mai se tasi o sui o le Malo i lena vaitaimi e faaavanoa mai se taimi pe a mae’a le tai tolu masina ma faatino se talanoaga e pei ona iai le faamoemoe i le afiafi nei.”
O lea na faafetaia ai e le Peresitene ma le asosi o tagatanuu Fiti i Samoa nei ona o le avanoa foi ua maua e faatalanoa ai lenei mataupu ma le Palemia ina ia mafai ona fesoasoani mai ia i latou o loo aumau i Samoa nei.
