O sui matutua o le itumalo o Gagaemauga No.2 (Safa’i, Lelepa, Satoalepai, Fagamalo, Avao ma Saleia), o matai o le faletolu a Gagaemauga No.3 (Sasina, Letui ma Fagaee) faapea le afioga o Satuiatua o le itumalo Palauli No.1 lea ua tuu atu le latou talosaga i le Palemia faaauau lē tumau Tuilaepa Lupesoliai Sailele Malielegaoi ina ia alu ese ma le nofoa palemia.
Ua tuuaia e le Itumalo Gagaemauga No.2 Tuilaepa e faapea o loo ia faia gaioiga e taumafai ae faatuai ai le iuga o le Palota ma saga faalumaina ai le atunuu i le lalolagi atoa mai le musu e talia lona faiaina ai mai le faigapalota.
O le susuga ia Fa’amoetauloa Evile na fai ma fofoga o le itumalo na tuuina mai ai le latou manaoga.
Taua e Faamoetauloa “Samoa ua maea ona fai le faigapalota ma ua palota foi le atunuu e filifilia ai taitai mo Samoa, peitai o lea faaiuga ua ua faaleaga e le gaioiga le talafeagai a nisi o i latou”.
Fesili le itumalo poo ai la e tuuaia i nei faaiuga.
Na muamua ave le faamalo a Faamoetauloa ia Tuilaepa mo lana tautua i tausaga e tele ua tuanai peitai na ia taua ona o le tulaga o loo iai Samoa i le taimi nei ua toe aafia uma ai ana galuega lelei na fai i tausaga e tele ua tuanai.
Mo le faletolu na o latou faaleo e faapea e iai le latou talitonuga o faaiuga e tuuina mai e le faamasinoga e tatau ona usitaia e tagata uma ma e ave tele le lagolago a ia afioaga i le faamasinoga ma a latou faaiuga fai.
O le amataga foi o le vaiaso na tuu atu ai se manatu o matai o Taupa’ū ma Salelologa o le a ave le latou lagolago i le Faamasino Sili ma le faamasinoga ma talosagaina ai le HRPP ma le Palemia o le Malo Tausi ina ia fai le amiotonu.
O le talitonuga a nei itumalo ua tatau ona tauaofia loa le Palemene lea ua afa le tausaga 2021 e lei maua lava se faigamalo a Samoa.
