Ua lē faigofie i le faamasino le afioga Fepuleai Ameperosa Roma ona talia le talosaga a loia a leoleo, e faaui uma i tua moliaga o se tamā 49 tausaga le matua, ina ua suia le faamatalaga a le teineititi 14 tausaga o loo masalomia na aafia i se gaioiga solitulafono tau faiaiga ma lē ua molia.

O le teineititi o le tama a le tina o loo nonofo ma lē ua molia, o lona uiga e lē o se tamā moni o le teineititi.

Ua poloaina e le faamasino loia a leoleo ia tuuina atu se folasaga tusitusia e faailoa atu ai ni mau ‘anoa ma malolosi e faamalieina ai le faamasinoga i se faaiuga e talia ai le talosaga a leoleo e toe faaui uma i tua moliaga.

O le faamatalaga a le teineititi na fai i leoleo ia Setema o le tausaga na tea nei, a o nofo le teineititi i le vaaiga a le Toomaga mo ē Puapuagatia, o le tamaloa le toalua o lona tina na ia faia uma gaioiga solitulafono ia te ia.

E 11 itulau o lea faamatalaga tusitusia, peitai o le Aso Lua o le vaiaso nei ina ua valaau le mataupu mo le suesueina o molimau, na tuuina atu ai e loia a leoleo le isi faamatalaga a le teineititi ua ia faailoa ai e pepelo ma lē sa’o lana faamatalaga na faia muamua i leoleo.

Na valaau le teineititi e tulai mo ni fesili a le faamasino lea na faailoa ai e lē na aafia, e leai ma se isi e oo lava i lona tina na fai atua se faamatalaga i le suia o lana faamatalaga.

Na ia ioe foi ma faamautu lana mau e pepelo lana faamatalaga muamua.

Na sui le faamatalaga a le teineititi ina ua alu ese ma le nofoaga o le Toomaga, ma faamautu i lo latou aiga i se nuu e tu lata i le taulaga.

O le Aso Gafua a sau e tuuina atu ai le folasaga a leoleo e pei ona poloaina e le faamasino.