O lea ua talo se fono a tagata faigaluega uma a le Mālō e faamoemoe e faia i le Aso Toonai o lenei vaiaso peitai e le’o faailoaina i le faasilasilaga faalauitele le suafa o le peresetene faapea le komiti faatonu.
E le’o faailoaina i le faasalalauga le mafuaaga o lea fono ae Leai foi ni mataupu o loo faailoa ai o le a talanoaina i lea faatasiga. O loo iai ni molimau e le’o mafai ona faamaonia ua taua ai o nisi o faauluuluga i nisi o auaunaga a le Mālō o loo i totonu o tapenaga i le faia lea o le faatasiga a tagata faigaluega a le Mālō ma o loo tapena ai ma se tusi e tuuina atu i le tamaitai Palemia o loo i lana vaaiga le komisi e pulea tagata faigaluega a le Mālō.
O le Aso Gafua ma le Aso Lua na salalau ai luga o fesootaiga le Facebook se tusi o loo faamamafa ai ni lagona ua lagomia ai nisi o tagata faigaluega sinia a le Mālō ona o le latou mau ua lē tausisia e le faigamalo fou le latou mau tauave o le tutoatasi lea o tagata faigaluega uma a le Mālō i le latou aiā tatau.
O lea tusi ua faatūtū i le tamaitai Palemia le afioga Fiame Naomi Mataafa e mafua mai ona o nisi o faaiuga ua faamalolo lē tumau ai nisi o tagata faigaluega sinia ma e iai le talitonuga o le Loia Sili a le Mālō ma le Failautusi o le Fono Aoao Faitulafono.
Ua faailoa i lea tusi e le’o saini ai se suafa poo ni suafa o i latou na saunia o le latou mau ua galulue nei i se tulaga fefefe tagata faigaluega a le Mālō ma e o o aafia ai ma le faaauauina o a latou tautua i le Mālō.
O le aoauli atoa e oo i le te’a o le 5 i le afiafi o le Aso Lua 31 o Aukuso na saili atu ai se avanoa i le tamaitai Palemia mo le fia maua o sona finagalo peitai e le’i maua se avanoa i le tele o fonotaga sa feagai ma ia. Ua iai le talitonuga o le a maua sona finagalo i le maea ai o le fono a le Kapeneta ae i se ripoti a le Samoa Observer o loo faaalia ai e le taitaifono o le komisi e puipuia tagata faigaluega a le Mālō e leai se silafia o le komisi i ni fetineiaiga o aafia ai le lautele o tagata faigaluega a le Mālō.
O le pepa o faasalalauga mai le taitai o le vaega faaupufai a le HRPP i le po o le Aso Gafua o loo manino le faamalosiau atu ai o le susuga Tuilaepa Lupesoliai Sailele Malielegaoi i tagata faigaluega a le Mālō ina ia silasila toto’a i le tulaga ua agai ai le faigamalo fou i lana mātau ua lē tausisia ala faaletulafono e faia ai faaiuga i nisi o tagata faigaluega sinia a le Mālō.
O le finagalo a le tamaitai Palemia i tusitala i le vaiaso na te’a nei e sese ma lē sa’o ia faaaliga a Tuilaepa. O le fono ua tala’i ma faasalalau e le Asosi o tagata faigaluega a le Mālō o le a faia i le maota o le Tuutuu i le Loloto.
