O le loloto o le tulaga lē mautonu ua iai upufai a le atunuu e pei ona savalia nei le 4 masina e le’i usuia lava le Palemene e filifilia ai se faigamalo fou a’o tālia faamasinoga o tagi o faatosina o le palota ae o nisi o mataupu tau faamasinoga o loo finauina ai mataupu i le faavae popo a le atunuu. Ua faatūtū ai nei tuuaiga i le faamasino Sili ma nisi o faamasino e pei ona tuuina atu e le Komisi o galuega a le faamasinoga le faaseā a le vaega faaupufai a le HRPP e tauala atu i le failautusi a lea vaega faaupufai.

O le taitai a le FAST Fiame Naomi Mata’afa ma nisi o sui o lea vaega faaupufai o malo o loo faasaga ai nisi o ia o tuuaiga  i ni sootaga ma le faamasinoga o le mafuaaga lea o le tuuina atu e Fiame o sana tali tusitusia i le komisi o galuega a le faamasinoga  e fesoasoani ai i le latou suesuega e mafua ona o lea faaseā.

Faaalia e Fiame i sona finagalo faalauaitele na taloina ma le vasega o tusitala na ia taua ai o le faaseā ua tuuaia ai le faamasinoga ma i latou o se isi osofaiga a le Palemia Tausi lē tumau ma le faigamalo tausi e talepe a’i le maopoopoga ma le tutoatasi o le faamasinoga.

O loo finau le faaseā lenei o loo saini ai le failautusi a le HRPP Lealailepule Rimoni Aiafi e fautuaina le komisi se latou faaiuga faamalolo le tumau o le afioga i le Faamasino Sili Satiu Simativa Perese, o se tamalii na filifilia e le malo tausi i le masina o Mati i le tausaga ana tea nei ae na faatautō e tauave ona tiute ma tofiga o le Faamasino Sili i le masina o Iuni 2020.

Taua e Fiame “O le atugaluga tele ua tulai mai o lea ua afuafua se gaioiga e faasaga i le Faamasino Sili  ma le faamasinoga ae o loo loma le Aso Faraile o le vaiaso nei 17 o Iulai lea ua faatulaga e tagofia ai e le faamasinoga o apili le mataupu e uiga i le faatautoga a le FAST na faatino i le Aso 24 o Me 2021 ma faatonuga a le Palemene ina ia tauaofia le Palemene i totonu o le 7 o aso lea e le’i usitaia”.

Talosagaina ai foi e Fiame ina ia faamuamua le finagalo a le atunuu.

O le Aso Lua o le vaiaso nei na feiloai ai sui o le komisi o galuega a le faamasinoga e suesueina le faaseā a le vaega faaupufai a le HRPP o sana faaiuga e taunuu iai o le a tuuina atu i le Ao o le Malo ae faataunuu e le fono aoao faitulafono i le palota fulisia e manaomia ai le 2/3 o nofoa e 51 o le Palemene.

O lona uiga e tatau ona 34 palota e tatau ona maua e mafai ai ona faamalieina le talia o se faaiuga faasaga i le afioga i le Faamasino Sili.