Ua talimalo le faamasinoga a Samoa i le aumalaga o faamasino ma sui o le ofisa o faamasinoga a Niu Sila i le faamoemoe e usuia i lo tatou atunuu le uluai fono a ia faamasinoga e lua.

O le a talanoa ai le tele o mataupu e siitia ai le galulue faatasi o faamasinoga a atunuu e lua, aemaise o le fetufaa’i o tomai ma silafia o faamasinoga i le faafoeina o galuega tau faamasinoga.

O le afioga i le tamaitai Minisita o le Matagaluega o Faamasinoga a Samoa le tofa Matamua Vasati Sili Pulufana, na ia faafeiloai le usugafono a faamasino mai Niu Sila o loo taitaia mai e le faamasino maualuga o loo pulea le faamasinoga faaitumalo a Aotearoa faapea le sui o le Malo o Niu Sila le afioga i le alii faipule o le Palemene a lea Malo le afioga Aupito Su’a Toesulusulu Tofae William Sio.

O le aumalaga foi o loo aofia ai nisi o faamasino e iai piitaga tau toto i Samoa e pei o le afioga Mike Mika, Ida Malosi, ma Lope Ginnen.

O le amataga o lenei vaiaso fou ua faafeiloai aloaia ai i se ‘ava faatali a le matagaluega o faamasinoga ma le faafoeina o mataupu tau faamasinoga, a o lei faagasolo le fonotaga mo aso e tolu.

Faaalia foi e le Ofisa Sili o pulega o le matagaluega o faamasinoga a Samoa le susuga Papalii John Taimalelagi Afele, o le tasi o tāua o le fonotaga o le faasoa o silafia i tu ma aganuu e pei ona fuafua e feiloai le aumalaga o faamasino mai Niu Sila i le pule mamalu a alii ma faipule o le afioaga o Vaimoso, lea o le a latou faatino se tasi o tu a Samoa, o le faatinoina o le Ifoga.

Le Ofisa Sili o le matagaluega o faamasinoga ma le faafoeina o mataupu tau faamasinoga, susuga Papalii John Taimalelagi Afele.