Ua faatulaga nei le aso 5 o le masina o Iulai 2023 e faatino ai se iloiloga faalefaamasinoga ua ta’ua o le Judiciary Settlement Conference poo le JSC, e tagofia ai le talosaga a sui faipule e toatolu ua faamavae ma le pati faaupufai e puipuia aiātatau a tagata, e pei ona tuuina atu e le Fofoga Fetalai o le Fono Aoao Faitulafono ia faamavaega mo se iloiloga faaletulafono a le faamasinoga.
O le Aso Tofi o le vaiaso nei na toe valaau ai lenei mataupu, ma faatulaga ai le faia o se iloiloga i le talosaga a ia sui faipule le tofa Mau’u Siaosi Puepuemai, Ale Vena Ale ma Tu’uu Anasii Leota.
A maua se faaiuga o le talosaga mo le toe teuteuina o faamatalaga tusitusia a sui usufono ua molia ona faato’a manino lea o se aso e suesueina ai le talosaga ua faaulu e le Fofoga Fetalai e mafua i le faamavaega ma aiaiga o le tulafono o faigapalota ma le tulafono faavae, lea a solomuli ese loa se sui faipule mai se pati sa lagolago iai, ona avanoa lea o le nofoa o le itumalo ae toe foi e faatino le palota laititi.
O loo finau sui faipule e toatolu e le o faamavae ona o le fia lagolago i se isi vaega faaupufai e pei o aiaiga o teuteuga o le tulafono o faigapalota ma le faavae, ae ua oese ona o le fia see atu e avea ma faipule tutoatasi i totonu o le Palemene.
E pei ona silafia sa talosaga le vaega faaupufai e puipuia aiātatau a tagata e fia avea ma itu auai i le suesueina o le mataupu autu, peitai ua teena le talosaga ae ua mafai ona avea ma itu e faauilavea pe intervene e faasino lea i tuuaiga mai nisi o sui faipule e toalua o loo aafia i le faamasinoga.
O vaega o ia faamatalaga tusitusia o loo tuuaia ai le HRPP i le taimi o avea ma faigamalo i le faia o ia teuteuga ona o le manao e faatumau pea ona latou umia le pulega o le Malo.
