O le vaiaso fou o le a tuu mai ai se faaiuga a le faamasinoga pe talia le talosaga a lē sa avea ma leoleo satini o le malo o Khamtahn Stanley i le faapafala ai o se faasalaga mo ia e aunoa ma le faamaonia o sana solitulafono poo le discharge without a conviction.
O lea talosaga o loo teena e le itu a leoleo ae na faaititia mai le moliaga o le fasioti tagata pa’ivalea o le ua molia i le moliaga o le faao’o manu’a na mafua ai ona fano le soifua o se alii talavou 20 tausaga le matua o le afioaga o Vaiusu.
O lenei faalavelave na tulai mai i le tausaga e 2019 lea na matuā aafia ai lē ua maliu i se faaoogalima ma i’u ai ina uma lona ola i le falemai tele i Motootua.
Sa molia uma ai Khamtahn Stanley ma Lomalasi Ulugia lea foi ia faaitiitia lona moliaga mai le fasioti tagata pa’ivalea i le faao’o manu’a.
O le Aso Lua o le vaiaso nei na faatulaga e lau ai se faasalaga ina ua lā ioeina moliaga ma le solitulafono na la faia peitai o le talosaga e faapafala se faasalaga e aunoa ma se faamaoniaga o le solitulafono o se finauga lea o le a tulimata’i ai se faaiuga a le faamasinoga i le talia ma le teena pe a oo ina aumai se faaiuga i se faasalaga talafeagai mo i laua o loo tuuaia i le Aso 15 o Novema.
