Ua talia nei e le faamasinoga o talosaga poo le faamasinoga apili a le Faamasinoga Maualuga a le atunuu, le su’esu’eina e le Faamasinoga Sili o le tagi o se su, a se ulugali na fano le ola o le la pepe i le taimi na fanau ai le tina, ma tuua’ia ai le faatamala o le Matagaluega o le Soifua Mālōlōina.
O loo tuua’ia ai foi le faatamala o se auaunaga tuma’oti e faapitoa i ma’ito o tina ma tamaitai lea o loo umia ma faagaioia e le susuga Aiono Dr Alec Ekeroma, ua avea nei ma Faatonu Sili o le soifua mālōlōina.
Na faaulu le mataupu i le faamasinoga ae na lu’i e itu ua molia i se talosaga e taofi ai le faaauauina o le mataupu poo se strike out motion ma manumalo lea finauga faaletulafono.
O le mafuaaga lea na apili ai lea faai’uga a le Faamasino Sili le afioga Satiu Simativa Perese, ma faapena ona su’esu’eina i le tauaofiaga talu ai nei a le faamasinoga o talosaga.
O le Aso Lua o le vaiaso nei na faailoa ai le faai’uga a le faamasinoga apili lea ua faatonuina ai le ave o le tagi a le ulugalii o Kaino ma Steffi Fuataga e su’esu’eina ona e iai mau ‘anoa ma tāua o loo faavae ai le la finauga e tatau ona va’ili ma su’esu’e i tulaga aloa’ia faaletulafono.
Ua faatonuina ai e lea faamasinoga le totogi e itu o loo molia o le 5 afe tala i le itu na faauluina le talosaga apili.
O faamaumauga a le faamasinoga o loo faailoa ai e tasi tesimale 75 miliona le su i le tasi o ona vaega, i le ma le isi vaega o le su e $300 afe tala.
O le masina o Mati o le tausaga e 2022 na taofia ai le tina o Steffi Caruthers Fuataga i le falema’i tuma’oti ma le falema’i o Tupua Tamasese Meaole lea na fano ai le ola o lana pepe o se teine.
