O le talosaga a le taulealea o Laki Junior Silver ina ia nonofo faatasi ma le tamaitai o Sharleen Fidow ona ua tau nei le lima masina o lona ma’itaga ua le talia e le faamasinoga ina ua tulai le tuaa tina o Sharleen ma talosaga e lē manao e toe mafuta faatasi i laua ona na mafua ona aafia lona alo tamaitai i moliaga o le umia o pauta faasāina o le ‘aisa ona o le mafuta atu ia Laki.
O loo molia faatasi i laua ma le isi toatolu e aofia ai Vincent Patelesio Smith ma le tamaitai o Victoria Kalapu, ma Michael Savali Silver.
O i latou nei na taofia e leoleo i le osofaiga i Toamua uta i le tau amataga o le masina o Me, ma maua ai i le fale o se aiga i lea afioaga pauta o le aisa, ma laau faasāina o le maruana.
Na maua ai foi ma paipa o loo talitonu leoleo sa iai le faamoemoe e faaaoga i le ‘aisa.
O le amataga o le vaiaso nei na toe valaau ai le mataupu ua faamautu ai moliaga uma a leoleo faasaga ia i latou.
Ua tatala ai i tua ma Michael Savali Silver lea sa nofo taofia pea i le vaaiga a leoleo, ma ua faatonu e taofia lona tusifolau ma saini i le ofisa o leoleo i Aso Lulu uma a o lei tāina le 12 i le aoauli.
E lei tuuina atu ni tali a i latou i moliaga se’i faatali le aso 19 o Iuni e toe tutulai uma ai i luma o le faamasinoga sili.
O Vincent ma le tamaitai o Victoria ua iai le loia ua tulai mo i laua, ae o le isi toatolu ua fautuaina e faaaoga le avanoa ua toe tolopo ai lo latou faamasinoga e saili ai ni loia e tauaveina o latou moliaga.
Ua na o Vincent foi ma Victoria o loo iai le faatagana a le faamasinoga e nonofo faatasi ai a o tatala i tua i latou uma e faatali le isi valaauga o o latou moliaga.
