Ua tali ane le Rugby Australia i le mataupu o loo valaau ai nei sui o le Wallaroos e faatatau i le lē lava o tupe e faatupe ai taaloga a tamaitai.
E toeitiiti o tamaitai uma o le Wallaroos ua o latou tuuina se tusi i le Rugby Australia i le lē paleni o le faiga o ‘au e lua, le Wallabies ma le Wallaroos.
E tele ni mataupu ua laga e tamaitai taaalo i le tusi lea e aofia ai tulaga i totogi, o le eseesega i tulaga o femalagaa’iga a ‘au aemaise o polokalame fai.
Ua unaia ai i lea tusi le tatau ona tulai mai o le taitaifono, le fono faatonu ma le ofisa sili e faamuamua le lumanai o le lakapi a tamaitai i totonu o Ausetalia.
O le tali la ua faamatuu ane e le Rugby Australia ua ta’ua ai o loo faia pea ni laasaga agai atu i le tulaga faapolofesa ma o le a faaauau pea ona faaaofia e le Rugby Australia le Wallaroos i ana fuafuaga ma polokalame faalautele e aofia ai ma inivesi e faia i le taaloga lakapi a tamaitai.
