O le filifilia o le Faatonu Sili fou o le matagaluega o le soifua maloloina, ua osofai i se finagalo o le taitai o le itu agai o loo faamalolo le tumau ona tiute faafaipule.

I le feiloaiga masani ma nisi o tusitala na faaalia ai e le susuga Tuilaepa L Sailele Malielegaoi, o ia e ofo i le filifilia o le susuga afioga i le Polofesa susuga Aiono Dr Alec Ekeroma, ma faamaonia e le Kapeneta e avea ma faauluuluga fou o le soifua maloloina, ona o se tamalii e iai sana pisinisi falemai tuma’oti, ae o loo avea foi ma faauluuluga o le Iunivesite Aoao a Samoa. 

O ia tuuaiga a le taitai o le Itu agai na mafua ai ona aumai faalauaitele e le Minisita o le soifua Maloloina le afioga Valasi Luapitofanua Toogamaga Tafito Selesele, sona finagalo e ala i se pepa o faasalalauga faalauaitele e tali atu ai i le susuga Tuilaepa.

I lea finagalo o le minisita ua ia faaalia ai lona faanoanoa i se tasi e pei o Tuilaepa sa umi tausaga o seei i le taitaiga o le Malo ma lotolotoi i faaiuga fai, ae ua ia lē faatāua agavaa ma tomai aoaoina o se tasi o tamalii, o se tamafanau a Samoa ua lava lona silafia e tauave ai se tofiga e fetaui ma talafeagai ma ona faailoga maualuluga faafomai.

Ua faailoa foi e le Minisita, o le taitai o le Itu agai sa avea ma Palemia, na te silafia lelei lona taimi a o tu i matagiolo, o faaiuga fai i le tofia o faauluuluga o matagaluega a le Malo, e faavae i luga o tomai aoaoina o loo umia e i latou e talosaga, aemaise e lē faataetae aluga le faia o se faaiuga.

O saunoga foi a Tuilaepa ua faaalia e le Minisita e lē sa’o ma ua taitaiseseina ai lagona o tagata.

O se isi o tulaga ua faailoa e le minisita o le soifua maloloina, o le pisinisi le falemai tumaoti e faasino i le Polofesa susuga Aiono Dr Alec Ekeroma e pulea ma faagaioia e se pulega tumaoti, ma o se tasi lea o itu sa tatau ona malamalama ma silafia e le taitai o le Itu agai, o ia na tatalaina lea auaunaga tau pisinisi ina ua mae’a, a o avea ma Palemia.