O le fono a le komiti faatonu poo le steering committee mo le poloketi o le miliona tala lea sa usuia i le Aso Faraile na te’a nei, na folasia ai le lipoti o le suesuega i se vaegatupe o le tasi le miliona mo le itumalo palota o Faasaleleaga Numera 2, lea o loo fesiligia lona faaaogāina.

Na faailoa mai e le tamaitai minisita o le matagaluega o tina ma tamaitai atina’e o afioaga ma aga fesootai o loo vaaia le poloketi, le afioga Mulipola Anarosa Ale Molioo, ua mae’a ona toe silasila le matagaluega o tupe a le Malo i ni vaega o lea lipoti sa fia malamalama atili ai le komiti, ma ua toe foi atu ai le lipoti mo le talanoaina.

E lei faailoaina e le tamaitai minisita fautuaga o loo i le lipoti ae ua ia faailoa o se taimi o le a aumai faalauaitele se faamatalaga i se faai’uga a le Komiti Faafoe o le poloketi.

O le poloketi lava o le miliona tala, ua faailoa ai e le Minisita o Tupe le afioga Lautimuia Uelese Vaai i se lipoti a le nusipepa o le Samoa Observer, e iai nisi o itumalo ua tuuina atu i lana matagaluega e le Komiti Faafoe mo se sailiiliga i le faaaogāina o tupe o le poloketi poo usitaia ma tausisia aiaiga.

O itumalo ia e aofia ai Lepa ma Faasaleleaga Numera 5.