E ui ua iai le suiga i lenei taeao fou mai savili malolosi ma timuga mamafa sa iai ona o le afā o Gabrielle, ae o loo lagona pea le tiga ma le faigata.
O le taeao nei ua faamaonia mai ai e toalua tagata maliliu mai ananafi i Hawke’s Bay, o le toatasi o le tina na maliu i lona fale mafua mai i palapala solo ae o le isi toatasi o le tinomaliu na maua i le matafaga i matu o Napier anapo tusa lea o le toe kuata i le itula e 8.
E oo mai i le taeao nei e tusa ma ripoti mai leoleo e le o iloa lona suafa ma sona aiga.
I Hawke’s Bay lava ua faailoa mai e la latou Civil Defence Emergency Management ua iai le popolega mo Wairoa i le itu tau meaai ma vai taumafa ona o lea ua momotu ese atu lava e le vai.
Ona o lea ua talosaga ai nei agai i le NEMA mo meaai ma vai taumafa e oo atu i le vaiaso ona o lea ua le mafai ona sao iai se isi poo nisi lava galuega laveai e faaaoga ai taavale, seia vagana sapalai e momoli e helikopa.
Ae mai le ofisa o le vaaitau o le po anapo faasolo mai i le taeao nei o lea ua tele ina faaleaogaina ma faamāmā lapataiga sa iai mo le North Island ona o le afā.
Ae i tagata galulue faavaitaimi e aofia ai ma tagata Samoa i Hawke’s Bay, o se vaaiga faamomoiloto na molimauina i luga o le Facebook a o tuusao mai ai faasalalauga a nisi o tagata Tonga faapea tagata Samoa ananafi, e fai mai i luga o apa o fale sa nonofo ai ua toeititi lofia uma e le vai.
I le taumafai atu ai o tala fou agai i le ofisa o tineimu ma le Civil Defence mo se fesoasoani ona ua alu le aso o susū ma nonofo i luga o taualuga o fale, peitai o le tali na tuuina mai i luga o le telefoni e le na o le pau ia o tagata o loo taligā, e toatele aiga faapea tagata galulue faavaitaimi peitai e le tele ni helikopa atoa ai e le o faigofie ona o le tulaga o loo iai le tau.
O le tala fiafia, o lea ua agalelei ane iai nisi o ekalesia Samoa i Hastings e pei o le EFKS i le susuga i le Faafeagaiga ia Sunita Nua ma le faletua faapea le ekalesia, ma o lea ua faamautu ai o tatou tagata na omai i galuega faavaitaimi i le hall a le ekalesia.
