O le Komesina Maualuga o Samoa i le Malo o Fiti le afioga Aliioaiga Feturi Elisaia ua filifilia e le ofisa tutotonu o Malo o le Pasefika e na te taitaia le aumalaga o le a latou mataitu le faagasologa o le faigapalota tele a le atunuu o Solomona lea o le a faagasolo i le Aso Lulu le ogatotonu o lenei vaiaso.
Ua faailoa e le ofisa o malo o le Pasefika le Pacific Forum Secretariat i Fiti, ua lagolago i le galuega a le Komesina Maualuga o Samoa le sui o le Malo Vanuatu o le failautusi o le ofisa o le komisi mo le toe fuataina o tulafono a lea atunuu ae lagolago iai sui o le ofisa o malo o le Pasefika o loo galulue i Fiti.
O le mataituina o le faagasologa o le palota a Solomona poo election observers o se galuega tāua, o le a silasila ai sui o lea aumalaga i le tulaga o le a faatino ai le faiga filifiliga a lea Malo mo le toe filifilia o sui faipule o le Palemene o Solomona.
E pei ona silafia o se tasi lea o atunuu o le Pasefika i le saofaiga a malo Melenisia na ave iai le fesoasoani a atunuu o le Pasefika e ala i leoleo ma fitafita mo le leoleoina o lona filemu, ina ua tulai mai vesiga i le va o tagata o Solomona i ni tausaga ua tuanai.
E lē gata o le a mataitu e lea aumalaga le faagasologa o le palota ae faapea foi i le taimi e faitau ai palota.
O le faigamalo a le alii Palemia o Manase Sogavare o loo tulai i le taimi nei, ma o se faigamalo sa tulimatai e pulegamalo a isi atunuu o le Pasefika e aofia ai Ausetalia ma Niu Sila, ona o le momotu o ona sootaga faalemalo ma le atunuu o Taiwan, ae suia i le osia o lana faigapaaga ma le Malo o Saina.
