Ua taulai nei fuafuaga o galuega tetele o atinae a le Malo ma le faagaioia o auaunaga tau fela’ua’iga poo le transport and infrastructure, i le tusi ta’iala mo le isi 5 tausaga o lumanai i le faamoemoe e faatonu folau ai le auaunaga a ia tautua o loo faatino e le Malo.
O le taimi muamua lenei ua tuu faatasia ai galuega tetele ma fela’ua’iga i se taiala i le silasila a le faigamalo ua iai nei, ia sagatonu ma lelei le faatinoga o galuega ina ia manuia ai tagata uma o le atunuu.
Faaalia e le Minisita o Galuega ma atina’e tetele a le Malo le tofa Olo Fiti Afoa Vaai, o faailoga ma tomai aoaoina o tamafanau a Samoa ua atoa iai agavaa mo le faatinoina o galuega tau fela’ua’iga ma atina’e tetele ua ave iai le faatuatuaga o le Malo, i le fesili e tupu pea pe aisea e apaapa ai le Malo i tagata i fafo ae ua lava tapena o tatou lava tagata ua aoaoina lelei.
Se vaega o le saunoaga a le Minisita o Galuega ma atina’e tetele faapea fela’ua’iga le tofa Olo Fiti Afoa Vaai i le faalauiloaina o le tusi ta’iala mo fela’ua’iga ma galuega tetele mo le isi lima tausaga o muamua.
Ua aofia i le taiala fou le fuafuaga o le fausia o se auala mai Vaitoloa agai ane i Sogi ma o lea fuafuaga o le a mafai ai ona tuuitiitia le uumi o laina o taavale e agai mai i le taulaga i le taimi pisi o galuega ma aoga i le taeao ma le taimi o le afiafi.
