O le nofoaga o suesuega faasaienisi i Nafanua o le a avea ma se tasi o auaunaga o le a galulue faatasi ma le Matagaluega o Leoleo ma Falepuipui ma le Toefuataina, i le suesueina o soligatulafono e aafia ai le avamalosi ma nakoti poo fualaau faasāina.
Ua tauaao nei e le nofoaga o suesuega faasaienisi i Nafanua masini faaonapo nei e ala i se foai a le Malo o Ausetalia o le a faatino ai ia suesuega.
Faaalia e le Minisita o Faatoaga ma Faigafaiva lea o loo iai ma le vaaia o lea nofoaga tāua, o se taeao fou lea i Samoa ona ua iai masini e mafai ai ona suesue lelei ai solitulafono e fesootai i le tagofia o le avamalosi ma nakoti.
Se vaega o le saunoaga a le Minisita o Faatoaga ma Faigafaiva o loo aofia ai ma le nofoaga o suesuega faasaienisi i Nafanua, susuga Laauli Leuatea Polataivao Fosi Schmidt.
O le Komesina Maualuga o Ausetalia i Samoa o Will Robinson sa fai ma sui o lona Malo e tuuina atu masini mo suesuega o avamalosi ma fualaau faasāina i le Minisita o Faatoaga ma Faigafaiva faapea le nofoaga o suesuega faasaienisi i Nafanua.
Sa auai ma le Komesina o leoleo, ma se sui o leoleo a le malo o Ausetalia le Australian Federal Police i le tauaaoina o ia masini.
O le iai o ia masini mo suesuega i Samoa o le a lē toe tau ave ai e le tatou matagaluega o leoleo i Ausetalia ni vaega o suesuega tau avamalosi ma fualaau faasāina, ae o le a faatino lava i lo tatou atunuu.
