Ua manumalo sui tauvā o le Vaega Faaupufai o le Faatuatua i le Atua Samoa ua tasi i palota laiti a Falealili 1 ma Vaimauga 3, ina ua faailoa lautele le faitauga aloa’ia o le taunuuga o faiga filifiliga a ia itumalo palota e lua sa faia i le Aso Faraile ua mavae.

Ua maua ai e le pātī faaupufai o loo tumalo nofoa e lua ma umia ai e le Faatuatua i le Atua Samoa ua tasi le 34 nofoa i le aofaiga e 51 o nofoa o itumalo palota. O le afioga Seumafaleupolu Aperila Vaalotu ua manumalo i le nofoa o Falealili 1, ae o le afioga Nonu Lemauga Laulu William Mauia ua manumalo i le faigā filifiliga a Vaimauga 3.

Advertisement

I Falealili 1 o le sui tauvā ua manumalo le afioga Seumafaleupolu Aperila Vaalotu na ia maua palota e 456, tulaga 2 ai palota na maua e le sui tauva tutoatasi o Tuiloma Tusa Siiliili Laniselota Lameko e 268 ana palota, tulaga tolu le aofaiga o palota e 245 na maua e sē tasi o sui tauvā o le Faatuatua i le Atua Samoa ua tasi o Auseugalelei Uiti Lagavale.

O le sui tauvā o le Vaega Faaupufai e Puipuia Aiā Tatau a Tagata o Taveuveu Willie Tuatagaloa Fetu na ia maua palota e 162. O isi sui sa tauvā i le nofoa o lea lava itumalo o Fuaolemoli Falaila Faausu Allen na ia maua palota e 132, Patea Taveuveu Ta’amaletoa Aipovi Patea e 207 palota na ia maua, ma Si’a Faaletonu Alec Leaupepe Latu na ia maua palota e 128.

I le manumalo ai o Nonu Lemauga Laulu William Mauia ile nofoa o Vaimauga 3 i le aofaiga o palota na ia maua e 1,138, o le sui tauva o le Vaega e Puipuia Aiā Tatau a Tagata o Vaiofuaiupolu Chris Faaofo ua tulaga lua na ia maua palota e 1,007.

O le tasi o sui tauva o le Faatuatua i le Atua Samoa ua Tasi o Puaalatamai Tupuola Malaeulu Filemoni ua tulaga tolu i le aofa’iga o palota na ia maua e 935.

Tulaga fā ai palota e 456 na maua e le sui tauva le afioga Sooialo Feetau Lemigao Sooialo. O le faaiuga o ia palota e lua ua taoto mai ai le numela o nofoa o le paeaiga 18 a le palemene e 34 ua umia e le pati faaupufai o loo avea nei ma faigamalo, o le itu agai le Vaega e Puipuia Aiā Tatau a Tagata e 13 o latou nofoa ma nofoa e 4 o faipule tuto’atasi e aofia ai le nofoa o Lotofaga, Faleata 2, Siumu ma Vaa o Fonoti.