O se eleele o le Malo i Motootua o le a fausia ai se ofisa o le Malo Amerika Samoa ina ua toe suia le faaiuga e faatu lea ofisa i se eleele o le Malo i Avele.
O se lipoti mai le teritori a le faletelevise o le KVZKTV a o faagasolo le fono o le Atoa o Samoa i le vaiaso na tea nei, na faailoa ai le faamautu o le faaaogaina o se vaega eleele o le Malo i Motootua mo lea fuafuaga ma sainia ai le maliega i le va o le Kovana o le faigamalo a Tutuila ma Manu’a ma le tamaitai Palemia o Samoa.
O le fanua i Avele e latalata tele i le ofisa o le amepasa o le Malo o Saina, le mafuaaga o ni atugaluga sa faigata ai i taitai o le faigamalo a Amerika Samoa, ona talia le fausia o sona ofisa i lea nofoaga, ma faapena ona toe saili ai se isi fanua e pei ona see mai le fausia o sea ofisa i Motootua e latalata i le taulotoa’iga o galuega i le taulaga o Apia.
Ua faaalia foi i se lipoti a lea faletelevise a o faagasolo talanoaga i le va o taitai o Malo e lua ma latou usugafono i le Atoa o Samoa, ua faamanino ai e le tamaitai Palemia le afioga Fiame Naomi Mataafa, le mataupu i lafoga totogi e tagata malaga mai Tutuila ma Manu’a pe a latou tuua Samoa Tutoatasi.
O lea lafoga o loo totogi e tagata uma o soo se atunuu e malaga ese ma Apia ae o lona eseesega o le lafoga lea poo le departure tax ua aofia i le pepa malaga poo le pasese, sei vagana tagata e malaga mo Amerika Samoa e faatino lava le tulaga masani o le faatoa totogi pe a malaga ese, e mafua ona e iai faafitauli i le totogiina atu o lea lafoga i le pulega o malaevaalele, pe a tuu faatasi ma le pasese e totogi i auaunaga a kamupani vaalele o le Samoa Airways ma le Talofa Airways.
Ua faaalia o lea faafitauli o le tuai tele poo le lē totogia atu foi e ia kamupani vaalele o le lafoga i le pulega o malaevaalele a Samoa.
O le faaiuga o le vaiaso na toe taliu mai ai i Samoa Tutoatasi le taitai o le Malo ma lana usugafono lea sa aofia ai nisi o minisita o lana kapeneta, ma nisi o faauluuluga o matagaluega a le Malo faapea le Loia Sili.
E taunuu mai le tamaitai Palemia ma sui o lana usugafono, ae to’ai taunuu i Amerika Samoa le afioga i le Ao o le Malo ma lana masiofo mo le auai i le valaau faaaloalo a le Kovana ma le Lutena Kovana ma taitai o le faigamalo a Tutuila ma Manu’a i sauniga o le faamanatuina o le 123 tausaga o le Fu’a a Amerika Samoa.
