Ua faailoa e le Minisita o le Matāgaluega o le Soifua Mālōlōina i se auala o faasalalauga i luga o upega tafa’ilagi le faia o se su’esu’ega faalotoifale a lea matāgaluega, e sa’ili ai le tagata na ia ave i le vaega faaupufai o loo agaia le malo, ma le nusipepa o le Samoa Observer le kopi o le tusi mai le Ofisa Sili o le Matāgaluega o Tupe.
O lea tusi o loo fautuaina ai le Minisita ma le Ofisa Sili o le Matāgaluega o le Soifua Mālōlōina e toe faafoi i le matāgaluega o tupe taavale o le poloketi ona ua la faaaogā e aunoa ma se faatagaga a lea matāgaluega o loo iai le vaaia o le faaaogāina o taavale a le malo.
O loo ta’ua i le tusi o loo iai lava taavale ua uma ona aiaia e faaaogā e le Minisita ma le Ofisa Sili, ae lē o taavale o le poloketi.
Le afioga i le Minisita o le Soifua Mālōlōina le tofa Vaaaoao Salumalo Alofipo i sona finagalo i se faasalalauga i luga o upega tafa’ilagi sa faatalanoa ai e le sui o lea polokalame le susuga Tuilaepa Faafetai Li’o Su’a.
