E tea le ‘afa o le fitu o le afiafi o le Aso Lua o le vaiaso nei ae manuia galuega i le faaletonu na pa’ulia ai le tasi o vaa o le faalapotopotoga o vaa a Samoa le MV SSC Fasefulu.
Na mamulu ese loa ma le vaega na pa’ulia ai, toe faaauau ona malaga i Salelologa e tuu uta ma taavale ma toe foi ane ai i le uafu i Mulifanua.
Ua faamalulu ai le Minisita o le faalapotopotoga o vaa i le atunuu na malaga i lea vaa o le Malo ona o le aafia o a latou fuafuaga masani i le faaletonu na tulai mai.
Ua faailoa e le faalapotopotoga o Vaa a Samoa o le tea o le 11 i le taeao o le Aso Gafua na pa’ulia ai le vaa, ae o le ogasami tonu na tupu ai lea faaletonu e lē o le ogasami na pa’ulia ai le vaaleoleo o le Nafanua II.
O le vaa o le MV SSC Fasefulu ma le Fotu o Samoa na amata tautuaina malaga i le va o Mulifanua ma Salelologa mai le faaiuga o le vaiaso na tea nei, a o toso le vaa o le MV Samoa Express mo nisi o galuega masani o lea vaa la’u uta ma pasese a le faalapotopotoga o vaa a Samoa.
