O loo iai se tamaitai o loo sailia nei e leoleo i Aukilani ona o le maliu o se alii i le taeaopo o le aso ananafi.

O le leoleo suesue o Glen Baldwin sa ia talosagaina le atunuu ia fesoasoani atu i suesuega o lenei mataupu ma ua tuuina ai foi ma se poloaiga e pueina ai le tamaitai o Whitney Iraia Burgess mo lea faalavelave.

O lea tamaitai e pei ona faailoa e leoleo e le o fautuaina le agai ane iai o se tagata ma e talitonuina o loo fealuai i le taavale o le ituaiga Honda Accord ma le laisene PHL347.

Ua faamatuu mai foi e leoleo lona ata mo le silafia e le atunuu ma ua ta’ua i isi lipoti na maua le tino o lē ua aafia i tafatafa ane o se taavale sa paka i Symonds Street i le city i le 20 minute e te’a ai le lima i le vaveao ananafi.