O le Aso Faraile na tea nei na taualuga ai le faasavaliina o le sulu o le filemu a le Toomaga mo ē Puapuagatia, sa faatāua ai le momoliina o le feau tāua ia taofia sauaga faasaga i tina ma tamaitai faapea fanau teine a le atunuu.
O le matagaluega o faamasinoga ma le faafoeina o mataupu tau faamasinoga i lona ofisa tutotonu i Mulinuu na taualuga iai le faasavaliina o le sulu, ma saunoa ai le afioga i le Faamasino Sili, i le tāua o le sulu o le filemu e avea o se faamanatu ma se fagufagu i tagata uma.
O le 90 pasene o mataupu e oo i le faamasinoga, na faaalia e le Faamaino Sili, o mataupu tau solitulafono tau i sauaga faasaga i tina ma tamaitai faapea fanauiti.
O le eleele fou i le malae o le Friendship Park na faamae’a iai le faasavaliina o le sulu ma saunoa ai le Minisita o le Matagaluega o Tina ma Tamaitai, Atinae o Afioaga ma Agafesootai e avea ai ma sui o le Malo, e faafetaia le Toomaga i le galuega tala’i ua latou faatino mo le faalauiloaina o le tāua o le tetee atu i sauaga.
Le Minisita o le Matagaluega o Tina ma Tamaitai, Atinae o Afioaga ma Agafesootai, afioga Mulipola Anarosa Ale Molioo.
