Ua soloia e le ofisa o le Komisi o Faigapalota le lesitala o pati faaupufai e lua o le Tumua ma Puleono ma le Tautua Samoa.
Ua faia lea faaiuga e tusa o aiaiga o le tulafono o le lesitala o vaega faaupufai ona ua lē tausisia e ia pati faaupufai le totogi faaletausaga o le lesitala.
O le masina o Mati o le tausaga nei na soloia ma aveesea ai igoa o ia vaega faaupufai mai le lesitala e pei ona faailoa e le ofisa o le komisi o faigapalota.
E tasi le afe tala le lesitala faaletausaga mo le tausaga na tea nei 2022 ua lē totogia le mafuaaga o le faia o le faaiuga a le ofisa o le komisi o faigapalota.
Na faaalia e le faauluuluga o le pati faaupufai o le Tumua ma Puleono le susuga John Malaeolevavau Peterson na latou maua le tusi mai le ofisa o le komisi o faigapalota sa faailoa atu ai ia tulaga uma, peitai o le latou faaiuga o le a faamuta ai loa le lesitala ona ua taunuu le sini o le vaega faaupufai o Tumua ma Puleono ia suia le faigamalo e pei ona iai nei.
O le tasi lea o vaega faaupufai sa galulue faatasi ma vaega faaupufai o le Faatuatua i le Atua Samoa ua Tasi ma le SNDP i le palota tele o le tausaga 2021.
O le Tautua Samoa o se pati faaupufai na faavaeina ia Tesema o le tausaga e 2008 ma ua 14 tausaga talu mai le tausaga na tea nei talu ona faavae, ae o lea ua soloia ma aveesea ma le lesitala.
