I le tuanai o le 13 masina talu mai Me o le tausaga na tea nei na faamalolo lē tumau ai sui faipule o itumalo palota o Lepa ma Faleata 3, o le aso 3 o Iulai o le tausaga nei 2023 ua faamauina, o se aso ua faamuta ma faalēaogā ai e le faamasinoga sili, le faasalaga 2 tausaga na faamalolo ai e le Fono Aoao Faitulafono ia sui faipule e toalua.

O le Aso Lua o le vaiaso nei na folasia ai le faaiuga a le afioga i le Faamasino Sili afioga Satiu Simativa Perese, ma le afioga i le faamasino o le faamasinoga maualuga susuga Leiataualesa Darrel Clarke, a o faatumulia le potu faamasino numera tasi i aiga ma sui lagolago o faipule e toalua sa o la ave le faasalaga a le Palemene ua lu’i i le faamasinoga.

E le gata ua faamuta le faasalaga e le faamasinoga, ae ua toe maua foi totogi ma alauni o sui faipule na aafia.

O le faaiuga tusitusia o loo faailoa ai e le faamasinoga o le taimi umi o le faasalaga na faia e le Palemene e ala mai i le komiti o tulaga aloaia ma amioga taualoa a le Palemene, ua le gata ina maoa’e ae ua noatia ai le avea o tagata o itumalo na filifilia sui faipule e faaoo so latou leo i tonu fai ma faaiuga mo le lelei o le atunuu i totonu o le fono aoao faitulafono.

Ua faailoa foi i le faaiuga le talia e le faamasinoga o le tasi o finauga a le taitai o le vaega e puipuia aiātatau a tagata le susuga Tuilaepa L Sailele Malielegaoi ma le tofa Lealailepule Rimoni Aiafi, sa o la fesiligia ai teuteuga o tulafono tumau na pasia e le Palemene.

O tulafono tumau ia ua faasino i se faipule poo ni faipule e faamalolo lē tumau, e tapu ona toe faaali ni o latou manatu i tua mai o le Palemene i le taimi o loo tuli ai le faasalaga o le faamalolo lē tumau poo le suspension.

Ua faaalia i le faaiuga ua soli e ia teuteuga o tulafono tumau le saolotoga e faaali ai manatu o tagata e pei ona aiaia i le Vaega 13 o le tulafono Faavae.

O se tasi vaega tāua ua faailoa i le faaiuga o lenei mataupu, o le tiute o le faamasinoga o le puipui malu o le faavae i taimi e oia ai.

E 14 aso ua tuuina atu i sui faipule sa talosaga e tuuina atu ai e a la loia ni finauga e tusa o le totogi o le faamasinoga faapea foi ona tali atu ai loia a itu sa molia i le totogi o le a tuuina atu e le itu talosaga poo le itu tagi.