Na mae’a le sailiga siamupini a le All Blacks ma South Africa i le taeao o le Aso Sa, ae o le isi aso na sosoo ai, na faia ai loa se sauniga a le Word Rugby e tolaulauina ai nisi o faailoga mo tama taaalo faapea faiaoga ma ‘au sa iloga lo latou taumafai a o faagasolo le Ipu o le Lalolagi i Farani.
O lea sauniga sa tolaulauina ai loa le tama taalo o le tausaga lea ua faamanuiaina ma faapaleina ai le alo o le atunuu o loo taalo i le All Blacks le susuga ia Ardie Savea.
O le susuga ia Dan Cater sa ia fofogaina lea faailoga e faipaaga ma Mastercard, ma tauaaoina le ipu mo le susuga ia Ardie Savea.
A o faagasolo le taamilosaga atoa i Farani sa mataitu e le World Rugby le tama taalo iloga lona finau i taaloga taitasi.
E toafā tama taalo sa agai iai filifiliga, o le susuga ia Bundee Aki o le alo Samoa o loo taalo i Ireland, o le numera 9 a Farani o Antoine Dupont, o le loka numera 4 a Aferika o Eben Etzebeth faatasi ai ma Ardie Savea.
O le mae’a ai o le sailiga siamupini i le taeao o le Aso Sa na maimoa ai le lalolagi atoa i le malosi o le susuga ia Ardie Savea i le finauina o le All Blacks, ma o iina sa faamautu ai lagona o le World Rugby o Ardie Savea le tama taalo o le tausaga.
Ma o se faaeaea sili lea mo le atunuu o Niu Sila atoa ma le All Blacks ae faapea foi i soo se Samoa o loo i le lalolagi atoa i le maualuga o le tulai mai o lea alo o le atunuu i le taaloga o le lakapi i le Ipu o le Lalolagi.
