Ua amata taualumaga a le Palemene i le ogatotonu o lenei vaiaso i le talanoaina o le lipoti a le Komisi suesue o faigāpalota, lea sa filifilia ai mo le taimi muamua nisi o tamalii, failauga o faletua ma tausi ma sa’oao e lei tauva i se faigāpalota, latou te faatino lea galuega.
O se tasi lea o lipoti o loo iai fautuaga mo le faaleleia o faigāpalota a le atunuu, atoa ai ma faaletonu sa molimauina i le palota tele o le tausaga 2021.
O ia faaletonu ua ave ai ni fautuaga i le Malo ma le Palemene i ni fofo e mafai ona foia ai.
Peitai o le finagalo o le Palemene o le a fua iai le talia o ia fautuaga a le komisi suesue o faigāpalota.
O se tasi o fautuaga o loo tatali iai le toatele o o tatou tagata o alala i atunuu mamao, pe o le a mafai ona faatino mai fafo a latou palota e aunoa ma le tau malaga mai i Samoa.
