O le siosiomaga o le faigāpalota tele a le atunuu i le tausaga 2021 ma luitau ogaoga na tulai mai i lena faiga filifiliga aoao a Samoa, ua faaalia i le lipoti a le Komisi Suesue na silasila i mea na tutupu i lena taimi ua tusa nei ma le lua tausaga talu ai, e tulaga ese ai lava lena palota tele i le talafaasolopito o a tatou faiuga filifiliga e saili ai sui usufono o le Palemene ma le anoanoai o luitau ogaoga na tutupu ai.

I le aoao tetele o sailiiliga a le Komisi Suesue ua latou faamauina ai, sa lē mautonu le faatinoina e le Afioga i le Ao o le Malo o ona tiute o le Ulu o le tafatolu fefaatauagai o le faigamalo a Samoa i se tulaga tutoatasi, ae foliga ua tuuaulafo i timaiga ma fautuaga a le faigamalo tausi lē tumau.

E oo lava i le fono a sui tofia sa lei auai i le aso atofaina le 45 aso i le mae’a ai o le faigāpalota e tatau ai ona faatauto sui faipule na manumalo mai atoa ai ma le tulai mai o le faigamalo filifilia.

Fai mai le Komisi Suesue i le latou folasaga amata atonu o se isi lea vaivaiga o le na o le toatasi o le sui o le fono a sui tofia.

O le manatu o le komisi o loo malupuipuia e le faavae le tulaga sa tatau ona faatino e le Ao o le Malo i totonu o le 45 aso talu ona faatā’ape le Palemene.

Mo le agai i luma e ao ona silafia manino ma mulimulitaia e le Ao o le Malo ma le Fono a Sui Tofia o la tiute o galuega ma matafaioi o loo faama’oti mai e le faavae.

O le silasila foi a le Komisi Suesue i tulaga aoao tetele o lea faigāpalota a le atunuu, ua latou faatū ai se fesili pe o se aga masani ona tumau pea le galue o le Fofoga Fetalai sa iai ina ua mae’a ona faatā’ape le Palemene.

O le isi fesili o le a tonu lana galuega e fai ae ua malolo le Palemene?

O nei fesili e pei ona folasia i le lipoti a le Komisi Suesue e mafua mai i le gaioiga na loka ai faitotoa o le maota fono, ma lē mafai ona ulufale mo le usuia o le uluai tauaofiaga e faatauto ai sui na filifilia o itumalo mai lena faiga filifiliga a le atunuu.

Ua faailoa i le lipoti o le tala a le failautusi o le fono sa iai i lea taimi, ua alu le Fofoga Fetalai ma ki o le faitotoa o le maota fono.