Ua toe o ni nai vaiaso ona amata faagasolo lea o taualumaga o Taaloga o le Pasefika lea o le a talimalo ai Solomona.

Ua faailoa mai e le Peresitene a le Samoa Association of Sports and National Olympic Committee, Pauga Talalelei Pauga tulaga o loo iai tapenaga mo lenei faamoemoe.

“Taimi nei ua mautu uma tatou tapenaga o le ‘au atoa a Samoa lea o le a masii atu mo Solomona e toa 430 e aofia ai ma Pulega o ‘au taitasi ma Faiaoga.

“E $1.8miliona tala lea o loo tapena uma ai lenei malaga i pasese, togiga, vaega tau insurance a le autaaalo ma nisi tulaga.

“O le faamoemoe sa iai sa tapena mai le tausaga atoa i vaega uma ma fai siaki ona amata lea ona tuu ifo i lalo le numera mai le 700 e fua lava ia i latou e mafai ona iai le avanoa e maua ai ni tatou pine.”

E iai foi le talitonuga a le Komiti ua lava tapena le tatou ‘au mo le faamoemoe i Solomona.

“O le matou vaavaai ia e le o se tamai ‘au o le ‘au toatele lava lea a Samoa talu mai ona masii i fafo i taaloga a le Pasefika.”

O taaloga a le Pasefika i le taimi lenei o lea ua iai Niu Sila ma Ausetalia faaalia ai e Pauga o le tulaga ua iai taaloga i le taimi nei ua fai lava si maualuga.

“O le fiafiaga foi ua iai sa talatalanoa ma sports taitasi ua vaavaai ua tapena atoatoa mo lenei faamoemoe.

“O le agaga la lea e iai e leai ni tatou autafafao poo ni tagata foi ia e ave e atinae mai taaloga nei.

“Ua na o latou lava e iai le avanoa manino e mafai ona tauva mo ni tatou pine.”

E 24 taaloga o le a taaalo ai ‘au mai le atunuu ma le agaga maualuga ia manuia ma maua ni pine mo Samoa.