O se vaaiga uigaese i le maota o le Palemene i le vaiaso na tea nei ina ua mafai ona auai atu le silia ma le 200 fanau aoga o Aoga Tulagalua i le taulaga o Apia, e molimauina le faagasologa o galuega a le Fono Aoao Faitulafono a Samoa, e amata mai lava i le Fofoga Fetalai, Palemia, Minisita o le Kapeneta ma Minisita Lagolago faapea le Taitai o le Itu Agai ma lana Vaega Faaupufai.
O le lipoti a le Savali Newspaper na ta’ua ai o se polokalame na faama’ite e le Ofisa o le Failautusi a le Fono Aoao Faitulafono a Samoa, ina ia manino ma malamalama fanauiti i le tāua ma le aogā o tiute tauave a Taitai o le Malo, aemaise o mafuaaga e pasia ma teuteu ai Tulafono.
O loo faamauina i lipoti, na maua le avanoa e faasoa ai le afioga i le Fofoga Fetalai ia Papalii Li’o Oloipola Ta’eu Masipa’u, afioga i le Palemia, Fiame Naomi Mata’afa ma le Taitai o le Itu Agai, Tuilaepa Dr. Sailele Malielegaoi i le tāua o le tafatolu fefaatauagai ma pulega a Malo Temokalasi o loo lima taitaiina ai galuega uma a Taitai o le Malo o Samoa, e ala i le Pulega Faatonu, Palemene ma le Faamasinoga.
Faamanio e le tamaitai Palemia e leai se eseesega o le Palemene ma le fono a nuu ma aiga o loo faia i se fale tele, e soalaupule ma iloilo mataupu tāua e lima taitaiina ai le lumanai manuia o aiga, ekalesia ma nuu.
Ma o le faamanatu a le taitai o le Itu Agai o le tafatolu fefaatauāgai a le Faigamalo a Samoa, e siaki e le tasi itutino le isi itutino, ma e lē fesopoa’i matafaioi, o le Palemene e pasia ma teuteu ai Tulafono, o le Pulega Faatonu e faatinoa manaoga o le Tulafono, ae o le Faamasinoga latou te faauigaina le Tulafono auā le faamasinoga tonu poo uia pe ua solia foi aiaiga ma aulape o sea Tulafono.
Faamauina e matuā aogā lenei avanoa mo fanauiti, e molimauina ai itu māvae o le Malo o Samoa, auā o i latou o le a vae ma lima i ai le lumanai o le atunuu mo a taeao.
