Ua faamautū nei se foma’i e faia su’esu’ega ma ta’otoga faapitoa poo se pathologist auā su’esu’ega a leoleo i ni tino maliu e masalomia e fesoota’i i ni gaioiga solitulafono.
O lea foma’i e sau mai le atunuu o Fiti o le a galue i Samoa, ma o le faato’ā iai lea o se foma’i e faia ta’otoga faapitoa, e faamautū i lo tatou atunuu ma faia lea galuega i le tuana’i o ni tausaga e silia i le sefulu e lē o toe iai se foma’i e iai lea tomai.
O foma’i faapitoa sa aumai i Niu Sila ma Ausetalia ae totogi e le tatou malo, e faapena foma’i e faia su’esu’ega ma ta’otoga faapitoa o loo aumai mai Fiti i le taimi nei.
E pei ona silafia o le tausaga e 2020 na aumai e le malo o Saina se fesoasoani na malaga mai ai ni foma’i e faia ia ta’otoga faapitoa sa su’esu’e ai ni matāupu tau solitulafono sa gafa ma leoleo i lea taimi, ma o nisi tino maliiu sa su’esu’eina ai ua silia i le tausaga o tuu i le falemaliu o le falema’i tele i Motootua e le’i tuuina atu mo toe sauniga ona o le leai o se foma’i e faia ni ta’otoga faapitoa.
I le feiloa’iga a tusitala ma le Sui Komesina o le matāgaluega o leoleo, falepuipui ma le toe fuata’ina le afioga Leiataua Samuelu Afamasaga sa ia faailoa ai e 250 afe se vaegatupe ua fuafua mo le faafaigaluegaina o le foma’i mai Fiti o le a faia lea galuega ma faamautū i Samoa.
