E silia i le $5000 na aoina mai e le Matagaluega o Leoleo, Falepuipui ma le Ola Toefuataina i le afiafi o le Aso Faraile na mavae nei i se faaaliga ua ta’ua o le avanoa lona lua poo le Second Chance Arts Exhibition.

O lea faaaliga o fua ia o polokalame e toefuatai ai le soifua o e ua ta’usalaina ma ua avea Tanumalala ma o latou aiga ona o faasalaga o tuli ai. 

O le aoga tusiata i Tanumalala na faatuina mo a’oa’oga, o le faaosofiaga, ma ia taumafai e sui le amio ma mafaufauga o i latou o loo i le falepuipui e toe fuatai le mafaufau ma le olaga.

Sa toatele le aufaipisinisi ma le atunuu na auai e molimauina le galuega matagofie aemaise o se tautiga o le Ofisa o le malo tele o Peretania i Samoa faapea le faleoloa o le SSAB le lagolago malosi e faamaite lea suiga lelei i olaga o e o loo tuli faasalaga i Tanumalala.

O le toatele o pagota e leai lava se isi na iai se iloa ia pe toaitiiti foi sa mafai ona maua ai ni agavaa tau tusiata peitai o lea aoga ua vaai ai le tulai mai se tulaga e faafiafiaina ai e le gata o le atunuu ae o aiga o i latou ia, pe a magalo mai ua iai se taleni e mafai ona galulue ma maua ai le seleni, suia ai mafaufauga ma amio ma aua ne’i toe vaaia soligatulafono.

Na faailoa o se tasi lea tulaga ua faafiafiaina ai le Matagaluega pe a manatu i le tele o faafitauli ma tala e le fia faalogo iai ae o loo iai lava se moemoe ola e maua le avanoa lona lua e tulai ai ma suia le olaga.