Lipotia e le stuff.co.nz i le asō se tamaitai Samoa sa faamaonia moliaga taufaavalea ma sa aumau ai i Niu Sila faaaoga ai le igoa o se isi tagata mo se taimi umi.
O lea tamaitai 51 nei ona tausaga sa soifua ane i Samoa ma o loo ta’ua i le lipoti o le 1991 na ia faaaoga ai le identity poo faamaumauga o se tagata Toelau, o se tasi o lona aiga ma malaga mai ai i Niu Sila faaaoga ai le tusifolau o lea tagata.
Ona o Toelau o loo i lalo o lio o Niu Sila, o i latou mai lea motu ma soifua ane ai e mafai ona umia tusifolau Niu Sila.
Mai le taimi atoa lea sa aumau ai lea tamaitai i Niu Sila ma sa ia sponsor ina foi le aumaia o lona toalua na soifua ane i Fiti, ma aumaia i Niu Sila nei i lalo lava o le igoa sa ia faaaogaina.
Faatoa aliae le tulaga le sa’o lea i le tausaga 2000 ina ua talosaga le tagata moni e ana le igoa sa ia faaaogaina mo se tusifolau Niu Sila.
Na faamaonia ai loa moliaga o lea tamaitai i le faaaoga o se tusifolau sese ma le tuuina o faamatalaga taufaasese i le malaevaalele ma faasala ai i le 100 itula community service ma le poloaiga e aveesea ai ma Niu Sila.
Finau lea tina ua silia ma le 30 tausaga o aumau i Niu Sila ma o le lipoti la lea o loo ta’ua mai ai se faamatalaga a le Tribunal e tatau ona iai se isi avanoa e toe nofo ai i le atunuu.
