O le toe pepesi o le fiva o ponaivi i totonu o le atunuu o le mafuaaga lea ua toe amata ai ona faatino faalauiloa a le Matagaluega i gaioiga e tatau ona fai ina ia tuuitiitia ai le pepesi.
Faaalia e le Pule Faatonu o le Matagaluega o le Soifua Maloloina o Aiono Dr. Alec Ekeroma, e silia ma le 25 tagata ua aafia i lea faama’i.
Ae i le polokalame a le Matagaluega o le Samoa Maloloina na faaalia manino mai ai e le sui faatonusili o Tagaloa Dr Robert Thomsen, o Apia agai i Faleasiu o loo toatele ai tagata o loo aafia.
E toalua mai Savaii ua faamaonia ua aafia, e toaititi lava e mai Manono ma afioaga i tua ae o le toatele o loo alala ma papaaao i afioaga tu taulaga.
Faaalia e Thomsen, ua afua ona pepesi le fiva o ponaivi ona o tulaga louloua o le tau lea na tele ina timuga ma lolovaia ai vaega uma o le atunuu.
O le fautuaga mai le Matagaluega o le Soifua Maloloina o le tausia o le tumamā lautele, faamamā tuamaota, o vaivai to’a ia e tele ina faamautu ai namu ma faaaogā tainamu e tofafā ai e faaitiitia ai le pepesi o le faamai.
O auga o le fiva o ponaivi e aofia ai le fiva, tiga sooga ponaivi, lē manogi se taumafa ma a ogaoga tele e ma’umau ai lava le soifua.
O le tausaga e 2017 na pepesi ai le fiva o ponaivi i Samoa ma aafia ai tagata e toa 1522.
E toa 339 tagata sa taofia i le maota gasegase ae toafā na faamauina na maliliu ai.
