E iai lape ma faaletonu ua molimauina i se suesuega sa faia e le ofisa o le Komesina o Sulufaiga, lea sa faatonuina e le faamasinoga e mafua i le maliu i le masina o Fepuari o le tausaga nei o Kolani Junior Lam sa tuli lona faasalaga soloatoa, i le solitulafono o le fasioti tagata faamoemoeina.

E pei ona lipotia ai e le nusipepa o le Sunday Samoan e sefulu fautuaga ua tuuina atu i le pulega o le matagaluega o leoleo falepuipui ma le ola toe fuataina e silasila iai ma faia iai se latou faatatau ina ua molimauina i le sailiiliga na faia o le maliu o Kolani, e le mafai e leoleo ona iloa uma gaioiga a pagota e o i se galuega i fafo mai o le lotoā autu o loo nonofo uma ai le aunofosala.

Ua fautuaina le faaaogā o drone poo masini lele faatonutonu e iai mea pueata e iloa ai se fanua atoa o loo galulue ai le aunofosala.

Ua fautuaina foi le tatau ona faamauina lelei faasea a pagota i ni mataupu latou te faailoa ma ia faatō’aga ona suesue aemaise ia iai se auaunaga faufautua poo se counselling service, mo le aunofosala e le manuia ni a latou talosaga e toe apili ai ni faaiuga o a latou solitulafono.

Sa toe apili e lē ua maliu le faaiuga na faamaonia ai lona moliaga ae e lei manuia.

Faaalia i le lipoti e toaiva pagota sa filifilia faatasi ma Kolani e faigaluega i se faatoaga fualaau’aina i le aso na tupu ai le faalavelave.

Na lavea le alofilima o lē ua maliu i le se’iina o se vao ma ave ai i le falemai o le falepuipui ma togafiti ai, ma faapea ona foi ai Kolani i le potu sa nofo ma tuli ai lona faasalaga.

Faaalia i le lipoti o se pagota sa i le umukuka i le aso lea na ia vaaia le ua maliu o loo suati ma ia logoina ai leoleo o le tiute ma faia ai gaioiga mo le auina atu i le falemai i Leulumoega tuai.

Na toe ave i le falemai i Motootua i le afiafipo o le aso lava lea ma maliu ai.

Ua faailoa i le lipoti o lea suesuega o se vailaau fanavao o le paraquat e fesootai i le maliu o Kolani Junior Lam.