Ua i luma nei o le Faamasinoga Maualuga lipoti o su’esu’ega faafoma’i i le tulaga o le mafaufau o le tamaitai o Papalii Sia Figiel, lea o loo molia i le solitulafono o le fasioti tagata faamoemoeina ma ua fā nei masina o nofo taofia pea i le vaaiga a leoleo i le falepuipui i Tanumalala.
O ia lipoti o su’esu’ega faafoma’i ua tuuina atu nei e loia a leoleo i loia a lē ua molia e faitau iai, ma avanoa ai se isi laasaga o le a tapena iai mo le isi valaauga o le mataupu i le Aso Gafua o le vaiaso asau.
Ua iai se mana’o o lē o loo molia e suia lana tali tetee i le ioe i moliaga, peitai o loo faatali lea tulaga i lipoti faafoma’i ua tauaao nei e le faamasinoga, i le ma le tasi o tapenaga pe iai se fetuuna’iga a leoleo i le suia o le moliaga o le fasioti tagata faamoemoeina i le fasioti tagata pa’ivalea.
O le talosaga e tatala i tua lē o loo molia lea sa faaui i tua, ua toe tuuina atu e le loia mo Papalii Sia Figiel.
