Ua faatalosagaina e le SPCA le toe lauliliuina o tulafono o le vaavaaia lelei o ta’ifau, ma valaau atu foi i le faigāmalo ina ia toe faatulaga le seleni lea sa iai muamua e faatupe ai le taooto o ta’ifau fe’ai ma ta’ifau o loo taaloa solo.
Ta’ua e lea faalapotopotoga, ua silia ma le 10 tausaga o latou taumafai pea e finauina le tatau ona toe iloilo le Dog Control Act o le 1996.
O si tinā matua o Mihiata Te Rore, 62 tausaga o le soifua, na uma lona soifua ina ua osofa’ia ma faatama’ia e ni ta’ifau se tolu a se fale i Kaihu i Northland i le Aso Lua talu ai, e faamauina o le lona tolu ai lea o ni osofa’iga mata’utia faapea a ni ta’ifau ua maliu ai se tagata i totonu o le 4 tausaga talu ai, ae o le lona fā lea i totonu o le atunuu atoa.
Ta’ua foi le vaega o loo vaaia meaola faapea i le pulega a le itumalo o Kaipara, e fā nisi faaseā na oo ane ia latou talu mai Novema o le tausaga talu ai i ta’ifau lava nei, ma e faalua ona asia e le aufaigaluega le fale o le aiga lea ia Fepuari, e ui e le’i mafai e le aufaigaluega ona maua se fesoota’iga e talanoa atu i le tagata e onaina ta’ifau ma e latou te le’i aveesea foi ta’ifau.
Ina ua fesiligia le minisita e gafa ma le mataupu lea, Simon Watts poo iai se fuafuaga a le faigamalo e toe faafou le Dog Control Act, na ia saunoa, o loo sa’ili atu i le tele o fautuaga e maua mai e faaopoopo i le galuega lea ua uma ona faataatia.
Puna o Faamatalaga: https://www.rnz.co.nz/news/national/587272/minister-mulls-changes-after-deadly-dog-attack-as-spca-calls-for-law-reform?cid=newsletter
