Ua mautinoa o le a iai se faatatau poo se gaioiga e faia e le matagaluega o aoga i le mataupu e pei ona alia’e ai se faalavelave i le vaiaso nei mai Whangarei lea na maua ai se tinomaliu o se tamaititi aoga na tau sailia i se malaga a le aoga na alu i Abbey Caves i le aso ananafi.
Na lipotia mai le faailoa e le minisita o Aoga, Jan Tinetti o le a talanoa ia i latou na aofia i le mataupu lea.
O le school trip a le aoga a Whangarei Boys High na alu i le faaitu lea ae tau sailia ai se tama aoga ina ua faaletonu le tau ma tetele timuga.
Na mafai ona sao ese uma mai tamaiti na auai i le malaga se’i vagana le tamaititi lea faatoa maua lona tino maliu i le po anapo.
Fai mai le minisita o se matuai tala faanoanoa ma e le taumate o le a tele ni faafesili i le mataupu lea.
Ua ta’ua foi i lipoti a le RNZ le toatele na faailoa le lē fiafia i le faaiuga na faia e faaauau ai lea malaga a le aoga a o fautuaina le loulouā o le tau.
Fai mai o se vasega e aofia ai tama aoga e toa 15 i le tausaga 11 atoa ma ni faiaoga se toalua na poloka ai i totonu o le ana lea ma valaau ai mo se fesoasoani.
Na mafai ona toe faasaoina uma i latou ia sei vagana si tamaititi e toatasi lea faatoa maua mulimuli ane.
Fai mai le minisita o loo faatalanoa le mataupu lea i le taimi nei ae ave le faamuamua i faamaisega ma alofaaga mo si aiga o lē ua aafia aemaise foi le aoga.
