I le lua vaiaso ua tuanai talu ona faailoa se faaiuga faapitoa a le Kapeneta i le mataupu i le maliu o le alii talavou 18 tausaga o ia lea o Tuau i se faalavelave tau taavale i Vaitele fou ia Aperila o le tausaga e 2021, e oo mai i le taimi nei o loo tālia e le Kapeneta se fautuaga mai le Loia Sili e tusa ai o vaega o lea faaiuga e pei o le silasila lea pe  tatau ona aumai ni leoleo mai fafo e faia se suesuega.

Ua faailoa e le Loia Sili o Helene Wallwork Lamb i le nusipepa o le Samoa Observer, o le taimi nei o loo iloilo pea e lona ofisa le suesuega a leoleo i le faalavelave, ma faamatalaga a i latou sa faatalanoa e leoleo.

Ua faailoa foi e le Loia Sili i lea lipoti ua mae’a ona ia fesootai i se leoleo o se sooupu mo galuega faaleoleo a Niu Sila mo le Pasefika ma o se tasi lea o vaega o le a aofia i se fautuaga o le a tuuina atu i le Kapeneta.