O le ifoga i le tatou aganuu faasamoa o se tu maualalo lea e faatino e se aiga o sē ua ulua ma ogaoga sana solitulafono ua fai, aemaise lava i le faaoo o le maliu i se isi tagata soifua.
O le faasifoga foi e ala i le faia o le ifoga e faailoa atu ai e lē ua matuia lana gaioiga ua fai, ua matua salamo.
O le mae’a ai o le fono tuufaatasi muamua i sui o faamasino o le faamasinoga a Niu Sila ma le faamasinoga a Samoa, ua taoto ai nei se alāfua e silasila iai le faamasinoga a Niu Sila i le mafuaaga ua faatāua ai e le faamasinoga a Samoa, faasalaga e faia i faiganuu pe a oo ina iloilo a latou faaiuga i se togisala mo sē ua faamaonia sana solitulafono aemaise lava i le moliaga o le faaoo o le maliu i se isi tagata.
Ua faaalia e le Ofisa Sili o le mtagaluega o faamasinoga a o faagasolo lea fonotaga tuufaatasi i le vaiaso na tea nei, e tāua tele le silasila o faamasino mai Niu Sila i le faatinoga o le ifoga e pei ona sa faatino e le afioaga o Vaimoso, auā o se oso tāua lea mo latou e silasila iai ia latou faaiuga fai, mo o tatou tagata o loo aumau ma faamautu i Aotearoa.
A o iai le aumalaga mai Niu Sila ilo tatou atunuu o se tasi o vaega tāua sa latou asia, o tuugamau tetele o loo lagomau ai nisi o le atunuu na fano ola ma soifua i le faamai tele.
O ia tuugamau o loo i le afioaga o Vaimoso ma o se fesoasoani a le Malo o Niu Sila na toe teuina faamatagofie ai le nofoaga ma le maa faamanatu ua faatuina ai, e manatua ai i latou na aafia soifua i le faamai tele.
