Ua siitia le totogi mo gasegase e fia maua togafitiga o fatuga’o i le falemai faamamā toto i Motootua, e pei ona faailoa i se lipoti a le nusipepa o le Samoa Observer.

O i latou mai fafo e malaga mai i lo tatou atunuu ae manaomia lea togafitiga i le falemai faamamā toto e 600 tala, ae mo tagata i Samoa o lea ua siitia foi le totogi mai le 30 tala i le 50 tala i le vaiaso.

Ua faailoa e le Pule Sili o le falemai faamamā toto i lea lipoti o le faatupulaia o tagata e manaomia lea togafitiga e lē gata i Samoa ae o i latou e malaga mai fafo o le mafuaaga lea na toe iloilo ai le totogi o le auaunaga, ma ave ai le fautuaga i le Kapeneta ma pasia ai ia Novema o le tausaga na tea nei.

O le totogi sa iai le faamamāina o le toto mo tagata e malaga mai fafo sa 150 tala i le togafitiga ae ua 600 tala nei i le faamamā e tasi, o lona uiga a faatolu i le vaiaso mo se faataitaiga e 1,800 tala.